Batimbang Tando
SAMPAILAH duo tigo bulan, salamaik sajo dalam kampuang, indak ado cacek maro malintang, agak dek Sutan Samparano, takana pulo dalam hati, rundiangan mandeh kanduang awak, maambiak judu adiak kanduang, nan banamo Si Buyuang Sidiek, bagala Pakiah Candokio, anak Tuanku Bijaksano, kamanakan Datuak Rajo Adia, anak rang kampuang Luruih Bana.
Dipikia-pikia dalam hati, jikok awak malalukan, banyaklah ilak jo geleknyo, mancari jalan bakeh lapeh, lalu dijalang mandeh kanduang,
“Manolah mandeh kanduang denai, pado pikiran hati denai, pihak di rundiangan nan dahulu, iyolah denai Mandeh suruah, mamanciang-manciang Buyuang Sidiek, lah denai pikia habih-habih.
Mandehlah malalukan pado bapaknyo, bapak Si Pakiah Candokio, batumpu tapak Mandeh jo inyo, kato panjang kok lai singkek, Mandeh lah lamo bakanalan, lai tu malu bamaluan, lah samo mandapek baso,” katonyo Sutan Samparano.
Manjawab Siti Juhari, “Kok lah baitu janyo Anak, iyo pulo tu kironyo, amak denai turuik samo surang.”
62
