ambo nak mananti, mupakat Tuan kini- kini.”
Mandanga kato nan bak kian, iyo Tuanku Bijaksano, lalu mupakat hanyo lai.
“Mano anak Pakiah Candokio, sarato mamak dang Si Buyuang, Datuak Juaro Manti Alam, urang lah datang bakeh denai, iyolah kakak Siti Juhari, handak manjapuik ka minantu, kan junjuangan Siti Budiman.
Alah denai timbang lahia jo batin, atau mudaraik jo manfaatnyo, alah denai kaji hino jo mulia, indak nan cacek tabandiangkan, lah denai bari pintak urang, tasangkuik pado janji sajo, kato lah tibo pado datuak, sarato Pakiah Candokio, jawablah kato nan sapatah.”
Lalu manjawab baliau Datuak Juaro Manti Alam, jo Si Pakiah Candokio, “Kalau lah habih mupakat tu, kami nan indak manyalahi, manuruik sajo di nan elok, hanyo taguahkan tigo bulan, mancari barang nan indak.”
Bakato Tuanku Bijaksano, kapado Siti Juhari, “Lah sudah kami mupakat, mintak janji kami dahulu, duo bulan masuak katigo, pado pikiran hati ambo, elok Kakak manarimo, bia lambek asa salamaik, indak lari gunuang dikaja.” Manjawab Siti Juhari, “Kalau baitu kato Tuan, ambo tarimo kato nantun, lapehlah ambo nak bajalan.”
Bakato Tuanku Bijaksano, “InsyaAllah baiaklah itu.”
Bakato pulo Siti Juhari, “Sapatah lai ambo pintak, sapanjang adat nan tapakai, biaso taduah nan bakajang, tando taguah bapamacik, nan arek bakabek pulo, elok kito batimbang tando, tukari malah cincin ambo, samantaro mananti janji, hiduik di dalam tangan Allah, kok mati di dalam janji, kan ganti kapan nan salampih, kok hiduik samo mangumbalikan, sabab baitu nan tapakai.”
Manjawab Tuanku Bijaksano, “lyo pulo tu kironyo,” ditariak
cincin ditukari, lah sampai pulo batimbang tando.
66
