Pihak Siti Juhari, lalu bajalan hanyo lai, pulang ka rumah badan diri, salamo lambek nan di jalan, lah tibo di korong kampuang, lalu dihimbau Sutan Samparano.
“Tantangan pado niat kito, alah denai jalang dang ayahnyo, ayah si Pakiah Candokio, basuo pulo jo mamaknyo, Datuak Juaro Manti Alam.
Allah Taala kayo sungguah, lai elok palangkahan, lai Mukabua pintak kito, inyo bajanji tigo bulan, lah denai tarimo kato nantun, sapanjang adat nan tapakai, ado tandonyo nan den pacik.”
Manyahuik Sutan Samparano, “Kok baitu taguah dipabuek, lah sanang hati den, nan sakarang kini nangko, sadio kito tangah rumah, mano nan kurang pado Mandeh, elok cukuikkan kini-kini, nak jan Mandeh taguluik-guluik.”
Manyahuik Siti Juhari, “Kok hanyo tantangan itu, namun baanak parampuan, alah lamo Mandeh sisiahkan, hanyo sabuah nan marusuahkan, badan batambah tuo juo, lorong kapado anak kanduang, pangajaran balun lai sampai putuih, denai kok mati musin kini, mamakiak bumi manganduang, babaliak-baliak dalam kubua, karano denai bakatinggalan, anak diaja balun cukuik.
Pado pikiran hati denai, sabab dek janji lah taganggang, pabilo hari nan baiak, nak kito bapadu padan, iyo barundiang jo bapapa, antaro hajat lai juo, buliah denai tambah pangajian, denai aja saketek lai.”
Manyahuik Sutan Samparano, “Kok itu Mandeh rusuahkan, pabilo hati Mandeh sanang, tunjuak ajari malah di Mandeh.”
Manjawab Siti Juhari, “Kok lah baitu janyo Anak, di dalam duo tigo hari, buliah denai tukuak pangajian, barang nan dapek pado mandeh,”
Habihlah parundiangan maso itu, hari lah patang hanyo lai,
bajalan Sutan Samparano, iyo ka rumah Puti Cito Dunia.
68
