Tanggung Jawab Suami
SAMPAILAH garan tigo hari, lalu dijalang mandeh kanduang, sambia bakato hanyo lai, “Manolah Mandeh kanduang denai, tantang janjian kito dahulu, alahkoh sanang hati Mandeh? Tunjuak ajarilah dek Mandeh, siang nan buliah dipatungkek, malam nan buliah dipakalang.”
Manyahuik Siti Juhari, “Kok lah baitu janyo Anak, buyuang ka mari malah duduak, buliah dicurai dipapakan.
Lorong karangan jo buatan, sajak di niniak muyang kito, kok lai takadia pado Allah, anak kok dijapuik urang, sumando ka korong kampuang, nan kawin iyo dangan niniak mamak, sakato jo niniak mamak urang, samupakat jo ibu bapaknyo, katahui condong ka manimpo, kok rantiang nan ka manganai, atau pantangan jo larangan.
Sadangkan nikah iyo dangan parampuan, indak jo padusi tak bamalu, nan indak manaruah budi baiak, indak bapi’i bataratik, walaupun rupo bulan panuah, janlah Anak manarimo, mambaok cacek jo binaso, hino malu kito sadonyo. Asa parampuan baiak budi, lai batunjuak baajari, manaruah malu dangan sopan, pakailah salamolamonyo, jan dipandang rancak buruak, usah diikuik pandang mato, setan ibilih pamenannyo.
70
