Kok lai barakaik budi baiak, manjadi tuah pandapatan, jikok Anak alah nikah, masuak ka korong kampuang urang, naiak kateh rumah tanggo, duduak di ateh kasua surang, paganglah bungka jo naraco, ganggam taraju jo katian, dangan karib jo karabat.
Kok basalisiah bini awak jo dunsanak saudaronyo, atau jo ibu bapaknyo, bacaran samo sarumah, tuhuak parang tu namonyo, kawani dek Anak jo kabanaran, berangi dek Anak bini awak, sambia manunjuak maajari. Usah bak laku urang kini, kok basalisiah parampuannyo, dicari aka nan buruak, dibuek asuang jo pitanah, diasuang bini awak, sampai malawan ka ibu jo bapak, atau kapado dunsanaknyo, akhia kalaknyo kamudian, urang lah banci kasamonyo, buruak balungguak pado awak, dalam gunjiangan urang banyak, kalau manungkuih bangkai busuak, babaun juo kasudahannyo, kok lah banci pulo dunsanaknyo, awak balaki bini sajo, mintuo manjuliang pado batin.
Usah maluak mausaki, tantangan budi nan marangkak, atau aka nan bapilin, handak maambiak harato bini, kan dijua jo digadaikan, usah dibuek tu Nak kanduang, elok disalang sungguahsungguah, atau dimintak kok lai buliah.
Kok indak awak kamanambah, jan dicinto mangurangi, kok indak kito babalanjo, usaho nan ka dipabanyak, kok indak bausaho, tolonglah urang jo bicaro, panjangkan aka dangan budi, baribu-ribu haragonyo.
Oi nak kanduang sibiran tulang, koknyo indak nan bak nantun, eloklah anak tatap sajo, mahuni kungkuangan dapua mandeh, usah babini sampaituo.
- Katahuilah oi Nak kanduang, banyak macamnyo urang sumando:
- Partamo Sumando Kacang Miang,
- Kaduo Sumando Langau Hijau,
- Katigo Sumando Lapiak Buruak,
- Kaampek Sumando Kutu Dapua,
72
