- Kalimo Sumando Bapak Paja,
- Kaanam Sumando Niniak Mamak.
Arati Sumando Kacang Miang, iyolah nan mangusuik nan salasai, nan mangaruah korong kampuang, bumi sampik alam tak suni, urang sarumah dipacahnyo, inyo manjadi upeh racun.
Arati Sumando Langau Hijau, indak buliah nan tacicia, ameh taserak di nan kalam, intan tacicia sadang bedo, uleh tingga inyo tabang, langau tak marangong lai.
Arati Sumando Lapiak Buruak, itulah urang kalongkahan, manjadi ijuak panamba, patang pagi dikicuah bini, awak kasiah bini manggendeng, bini kok dapek malu gadang, awak kan jadi aleh sajo.
Arati Sumando Kutu Dapua, indak bajalan hilia mudiak, korong jo kampuang indak ditampuah, karik kirabat tak paduli, namuah bakayu jo baapi, namuah manumbuak jo batanak, lah samak jalan ka tapian, lah kalam jalan ka pintu, lah elok langkah ka dapua, pado bininyo susah payah, bia badannyo marasai mati, mati ayam matilah tungau, dunia lah sadang sado nantun.
Arati Sumando Bapak Paja, inyo umpamo kumbang jantan, datangnyo rancak painyo pun rancak, datangnyo sanjo painyo pagi, satu pun indaknan diharok, pandai manggulai tak jo ayia, kanyang dek gulai ambuang-ambuang, manuak di muluik manih sajo, muluik raso diganggam, raso di tapak tangan sajo.
Arati Sumando Niniak Mamak iyolah bumi langik kito, kan ganti cincin jo galang, payuang panji tampek balinduang, jadi sitawa jo sidingin, kalau tapanjang dikareknyo, koksingkek diulehnyo, aka budi bicaro dalam, paham elok kito santoso, salamaik dunia jo akhirat, lahia batin tak barupatan.
Oi Nak kanduang dangakan pulo, lah banyak urang mandeh danga, mambuek laku nan indak baiak, taratik nan indak patuikpatuik, sambia manyilam minum ayia, mangguntiang dalam lipatan, akhia kalaknyo kamudian, tasando mandeh kanduangnyo, tajua sawah
74
