Arati ‘Pangulu Tupai Tuo’, elok nan tak mangalua, gadang nan tak mangatangah, diri dibaok manyuruak sajo, bak karobong talua itiak, eloknyo dibuang sajo, tacampak ka baliak rumah, indak kumbali naiak lai, bak itu sipat tupai tuo, indak tatampuah ujuang dahan, diam di bawah tapi sajo, kalau Pangulu nan kalinduangan, alek indak nan baturuik, jalan indak nan batampuah, manaruah sagan jo ragu, walaupun undang alah dikaji.
Arati ‘Pangulu Pisak Sarawa’, itu Pangulu nan jahanam, hino bangso randah martabat, hati mahiang pahamnyo busuak, budi anyia pikiran ariang, panjang aka nan malilik, panjang bicaro nan mangabek, cadiak nan manganai sajo, muluik manih bak tangguli, lamak nan bak raso santan, bak mamakan pisang masak, elok tipu manih umbehnyo, tukang piuah tukang pilin, pilin kacang nak mamanjek, pilin jariang nak baisi, pangicuah urang di nagari, panipu korong jo kampuang, panjua anak kamanakan, bapitih disaku urang, indak mancari ameh alai, itulah Pangulu busuak ariang.
Sabagai pulo oi Nak kanduang, kok tumbuah silang jo salisiah, ataupun bantah jo kalahi, sangketo nan tak putuih, dandam kasumat nan tak habih, tumbuah di dalam payuang awak, atau di dalam nan saindu, kalau maukua samo panjang, kalau mangati samo barek, kok cadiak usah nak mandapek, kok gadang usah nak malendo, randah suko mudo bilangan, hilang rean takucak tuah, binaso adat dek itu.
Kalau Anak pakai nan bak kian, bumi cayia langik lah runtuah, tampek bagantuang nan lah sakah, bakeh bapijak nan lah taban, taluak hancua rantau lah kusuik, alamat susah badan diri, hati mabuak badan tak sanang.
Kok paningga denai mati, tiok bulu manangguang sakik, kutuak mamakan hanyo lai, kanai di sumpah parbuatan, dek umanaik indak dipacikkan. Sabagai pulo oi Nak kan- duang, pagang pituah urang tuo,
82
