papikekkan, malu bana di hati mandeh.
Sabagai pulo oi Nak kanduang, amaknyo tarang-tarang lareh, nan duopuluah duo nantun, baindang batimpih tareh, batintiang dadak di niru, amaknyo tarang satu-satu, kalua untuang takadia Allah, salamaik sajo karajo kito.
Kalau nak sanang hari Buyuang, cubolah bajalan hilia mudiak, jan takuik babareh baka, walaupun jauah jalang juo, nak tapakai kapandaian, jan dibaok lalok tidua, usah dibaok makan kanyang.
Jan bak cando urang kini, gilo deta jo saluak sajo, awak Pangulu janyo urang, malah urang mahimbau Datuak, kuduak angek hati lah gadang, labu jo kundua tak babeso, indak tahu di cupak gantang, indak tahu di adat limbago, hukum sarat jauah sakali, kalau lai bana baguru, nak pandai sabatang rokok, nak malin sagalok dama.
Pado pikiran hatinyo, dirinyo tahu sacukuiknyo, kaduik panuah uncanglah saraik, langkok alemu kapandaian, pado siapo baguru, awaklah boneh satangkainyo, tahu di buek nan malingka, pandai di adat jo limbago, tahu di cupak dangan gantang, tahu di undang nan duo puluah, pandai manguji baso-basi, buni muluik marandang kacang, buni kecek mambaka buluah.
Kalau barundiang jo nan binguang, lalu sajo muluik awak, paguno lidah indak batulang, bak urang manembak tabiang, dipagadang paluik rabuak, dipaelok tungkuih garam, kato gadang tìmbangan kurang, indak baisi dalam kulik, rundiangan banyak indak bapaham, indak tantu ujuik mukasuiknyo.
Kok basuo jo nan pandai, nan tahu di mahia paham, lah malang tibo ka awak, jadilah sunyi-sanyok sajo, suaro gagok- gagokkan, bak buni aguang tatungkuik, sumangek lah kalinduangan, rahsio dihimpik urang, bak itiak tangah galanggang, bak kuciang dibaokkan lidih, bakato lidah kalu, barundiang manaruah takuik, dado lah diguncang gampo, paluah lah turun ka hiduang.
88
