Tali pitunduak jo pakasiah
Pakaian urang maso itu
Talabiah rajo rajonyo
Lorong kapado Angek Garang
Kabaapo bana kasanyo
Bak mano banalah jaheknyo
Tamak jo loba dipakainyo
Tapi taradok ka si Mayang
Inyo manih bak tangguli
Iyo lamak bagai santan
Sabagai pulo itu garan
Inyo disabuik alah gaek
Iyo urang tuo bangka
Dek bininyo alah sapuluah
Tapi ditiliak-tiliak bana
Kan barapo banalah umuanyo
Inyo kawin umua tujuah baleh
Memang adaik di maso itu
Sapuluah banalah bininyo
Hampia tiok taun dicaraikannyo
Hanyo nan tuo nan gak lamo
Saratoi Puti Pinang Masak
Lorong ruponyo Angek Garang
Biapun indak anggun bana
Tapi lai tampan juo
Dek inyo anak rajo-rajo
Indak panah karajo barek
Indak tau manjantiak tanah
Sabagai pulo itu garan
Dek adaik di maso itu
Jakok Puti indak rancak
Indak kawin nyo jo rajo
98
