Lah sampai ka dalam rumah
Inyo lansuang ka ruang tangah
Disinan barunyo baranti
Ditagakkannyo Mayang Taurai
Tangannyo mambalik pinggang
Iyo pinggang paja rancak tu
Bakato inyo maso itu
"Mano Kak tuo Nilam Cayo
Iko mah inyo adiak kakak
Urang rancak nan kakak puji
Ambo cakau ambo bawo tabang
Jinak bak ayam dalam kandang
Indak mambantah indak manulak
Sananglah pulo hati ambo
Nan sakarang kini nangko
Tarimo inyo di rumah ko
Kito dek alun lai baralek
Buruak jangga diliek urang
Kok inyo lansuang ka ustano
Manuruik kato ayah di sanan
Iyo di nagari Koto Tuo
Inyo alun manampak bulan
Ambek kito baralek daulu
Dalam sabulan duo nangko
Bia inyo lingga jo kakak sajo
"Kok jinak bana lah marpati
Elok inyo dijago bana
Indak cukuik jo sangka sajo
Dek kito manguruang inyo
Kakak agiah inyo batali
Iyo batali banang suto
Nan tidak lapuaknyo dek ujan
Tidak lakangnyo dek paneh
96
