Alah ka jaleh tu dek Kakak
Dalam inyo bakato itu
Tangannyo manggapai badan si Mayang
Areknyo bak banang suto
Maalun paja jolong gadang
Lah lupo inyo ka berangnyo
Indak takana lai bancinyo
Malakok sajo inyo kini
Sanyum saketek ka Nilam Cayo
Mandanga kato nan bak kian
Bakato Puti Nilam Cayo
"Mano diak kanduang Mangkuto Ameh
Jikok baitu kato adiak
Sananglah pulo hati ambo
Kok inyo kan tingga siko
Batambah suko ambo garan
Jadi sumarak rumah gadang
Indak panah didiami gadih
Anak denai saurang sajo
Lah mati pulo inyo kini
Si Upiak Puti Mayang Taurai
Buliah paubek-ubek ati
Mano Upiak mano diak sayang
Ganti malah baju Upiak
Lah basah garan dek paluah
Mari kito kaateh anjuang
Buliah beko samo makan
Iyo jo inyo kakak kau
Iyo Tuanku rajo kami
Si Mayang tampaknyo alah kanai
Dikabek tali banang suto
Tali ndak tampak dek mato
Indak taraso tu dek jari
97
