Lah sudah minum jo makan
Lah pulang Tuanku Mangkuto Ameh
Barisuak pagi datang pulo
Mambawo dukuah bungo tanjuang
Nan batabua pamato intan
Sasudah dukuah di kaluangkan
Iyo ka lihia Mayang Taurai
Dicimumnyo lihia itu
Dicium sapueh hati
Sudah itu dicakiaknyo
Dicakiaknyo sampai mangasan
Disangko si Mayang kan mamakiak
Tapi inyo diam sajo
Antok aniang saribu kato
Baitu hari barikuiknyo
Lah sampai duo kali tujuah
Taruih baitu dibueknyo
Iyo dek Sutan Mangkuto Ameh
Lah cukuik barang dibawonyo
Galang tangan galang kaki
Sapasang-sapasang itu garan
Subang jo cincin alah pulo
Barang tu malakek di badannyo
Iyo di badan Mayang Taurai
Tapi inyo aniang juo
Usah mangecek inyo amuah
Tasanyum sajo inyo indak
Romannyo batambah rancak
Maalun urang bapingik
Indak ado kalua rumah
Indak buliah sato bakarajo
Karajonyo basikek jo babadak
Nyampang urang ko indak tau
Inyo lai pandai mangecek
105
