Indak mamusiang tu dek inyo
Bajalan capek Angek Garang
Maulonyo tibo di tapian
Dielonyo padang dari saruang
Diasah pado batu licin
Ado sabanta sudah itu
Lah tibo garan nan baduo
Bakato Puti Nilam Cayo
"Mano diak Kanduang Puti Mayang
Lakeh lah sambah kakak kau
Usah katonyo nyo lakukan"
Tapi si Mayang diam sajo
Inyo tagak indak bagarak
Mahadoki matohari tabik
Rusuahlah hati Nilam Cayo
Inyo lah sayang ka si Mayang
Alah sabulan mah bacampua
Manangih inyo maso itu
Bakato pado dang adiaknyo
Mano diak Buyuang Mangkuto Ameh
Usah mukasuik dilalukan
Manyasa gadang buyuang beko
Salah paja ko alun tantu
Inyo taruih manyarah sajo
Sagalo kato dituruiknyo
Tasabuik Rajo Angek Garang
Lah berang bana inyo garan
Mamakiak inyo maso itu
"Bia padang ko makan darah
Nak sanang bana ati kau
Nan elok urang pabuek
Di kau indak nan mangasani
Dikaja garan Mayang Taurai
Iyo dek Rajo Angek Garang
109
