Lansuang sakali kadalam biliak
Basuo dengan Sutan Maulano
Mano ang buyuang Sutan Maulano
Denai iyo sangaik suko
Kok buyuang tingga di siko
Tapi untuak buyuang surang
Babahayo tu nak kanduang
Nagariko iyo dakek bana
Jo nagari Koto Lamo
Pado pikiran hati denai
Elok buyuang ka Koto Anau
Katampek mamak ang nan di sinan
Urang saayah jo andeh buyuang
Inyo iyo lai mudo juo
Iyo adiak dek Nilam Cayo
Tapi kakak dek Rajo Mangkuto
Sabagai pulo itu buyuang
Inyo banyak kapandaian
Iyo ilmu nan baguno
Mamak ang Tuanku Mangkuto
Banyak baguru pado inyo
"Jikok baitu kato Niniak
Sananglah pulo hati ambo
Tapi anyo akan sabuah
Ambo alun panah kasinan
Iyo nagari Koto Anau
Jalan ambo itu garan
Iyo sampai Supayang sajo
Indak buliah dek andeh ambo
Iyo ambo bajalan jauah"
"Lalok Buyuang di siko daulu
Barisuak kito barangkek
Bia niniak maanta Buyuang
Nak sanang hati Nilam Cajo
117
