Isuah niniak kaba kan pulo
Bahaso niniak iyo mandanga
Dek buyuang alah mah mati
Dibunuah urang parampok
Itan jauah di Rimbo Panjang
Di jalan ka Alahan Panjang
Kok itu alah tadanga
Iyo dek mamak kanduang buyuang
Lah sanang malah atinyo
Sanang pulo buyuang di rantau
Indak dikutiak urang lai
Kok taragak Buyuang isuak
Nak basuo jo andeh bapak
Bia inyo pai ka sanan
Kok lai ambo iduk juo
Ambo malah maantakannyo
Adokoh sanang ati Buyuang"
Jakok baitu kato niniak
Lah sanang garan ati ambo
Kok lah buliah kito barangkek
Amak mandi ambo daulu
Mano garan pakaian niniak
Iyo nan kan ambo pakai"
"Manolah Buyuang urang mudo
Alah ase garan niniak buyuang
Iyo dari malam cako
Iko baju nan ka dipakai
Iko pulo nan kan dibawao
Nasi jo samba ado pulo
Untuak kito makan di jalan
Kok lambek basuo lapau
Usah kito kalaparan
Baju buyuang nan dipakai ko
Tinggakan malah di siko
125
