Iyo ameh sapuluah tata
Kan pokok Sutan baniago
Katiko baralek Rajo Angek Garang
Baralek jo Mayang Taurai
Babaliak Datuak Majo Lelo
Iyo kanagari Koto Lamo
Inyo datang jo padusinyo
Mambawo ameh lai sataia
Pado maso dewaso itu
Mamintak inyo bakeh kakaknyo
Kok lai izin kakaknyo
Handak maambiak Sutan Maulano
Iyo untuak anak gadihnyo
Nan banamo si Cinto Manih
Manolah kakak kanduang ambo
Ambo datang kamari nangko
Indak untuak baralek sajo
Ado tu kandak bakeh kakak
Dek itu padusi ambo bawo
Tantang si Buyuang anak kito
Anak kito Sutan Maulano
Lah ampia satahun nyo jo ambo
Disiko taraso hari tu pendek
Dek kakak baralek taruih
Mulai dari kamatian
Alah sampai maratuih hari
Sampai pulo baturun mandi
Nan kiniko baralek pulo lai
Dek kami iyo urang kampuang
Tiok pagi tiok patang
Karajo nan itu itu juo
Indak ado tukuak tambahnyo
Indak manurun indak mandaki
Taraso bana yo panjangnyo
129
