Sutan ko nan ka jadi rajo
Manggantikan ayahnyo isuak
Acok tadanga dek rang lain
Inyo berang baturo turo
Mancaroteh ka andelnyo
Ambo kan indak mangapo-ngapo
Iyo di rumah kak tuo ambo
Kak Tuo Mayang Taurai
Mangapo ambo ndak buliah kaken
Mangapo ambo dikuruang
Kak Pinang umua duo baleh
Inyo lah buliah kawin
Kak Mayang baitu pulo
Ambo sajo nan dipingik
O andeh lapehkan ambo
Beko ambo mambunuah diri
Lah panek inyo berang baitu
Dibujuaknyo pulo mah andehnyo
Manolah andeh kanduang ambo
Ambo nak mandi ka tapian
Indak lamak mandi di rumah
Bukakkan pintu anjuang ambo
Ambo indak kan kamano-mano
Tolong antakan ka tapian
O Andeh dangakan juo
Pasuokan ambo jo kak Pamenan
Mangapo ambo ka dipatunangankan
Kok ambo indak tau jo inyo
Antah nyo pakak antah buto
Ambo ndak amuah manarimo
Kadang-kadang inyo manangih
Manangih sahari-hari
Bagolek-golek di katianyo
Indak amuah makan jo minum
141
