VIII. BONGSU URAI DILARIKAN
Tasabuik Rajo Koto Tuo
Mupakaik inyo laki bini
Kan maantakan Bongsu Urai
Ka nagari Sungai Pagu
Inyo bana nan ka pai
Baduo jo kamanakannyo
Iyolah urang Sutan Pamenan
Banyak taraso nan tak lamak
Kok si Bongsu dipaturuikkan
Dibawo ka Koto Lamo
Si Mayang akan mandarito
Angek Garang malangga adaik
Nagarinyo lah susah kini
Nagari lah kanai kutuak
Paneh sajo sapanjang taun
Tanaman indak babuah
Hambo rakyat mandarito
Lah pai urang nan manjapuik
Disuruah si Bongsu bapakaian
Baitu pulo dang andehnyo
Dikatokan kan pai ka Koto Lamo
Disuruah bawo tu pakaian
Iyo pakaian agak banyak
Inyo buliah tingga di sinan
Barang sabulan duo bulan
Di sinan inyo ka dipingik
Iyo dipingik dek kakaknyo
Iyo kakaknyo nan baduo
Manjalang inyo dikawinkan
lyo jo urang Sutan Pamenan
Gadanglah hati Bongsu Urai
Basorak sorak inyo garan
Badendang ka tangah jo katapi
144
