Kok salah tu baeko
Ambo surang nan kan salah
Nan lain indak tabawo
Kok buruak iyo ambo nan ka buruak
Usah ambo dilarang
Usah ambo ditagah
Ambo indak talarang jo tatagah
Manolah Mamak Pandeka Rajo
Sarato Mamak Dubalang Tuo
Naiaklah kaateh kudo
Saruangkan padang di kida
Angkek tombak jo kida
Pacik tali sabalah tangan
Turuik denai dari balakang
Kito manghadang Koto Tuo
Pacu kudo sacapek mungkin
Usah ado nan ka tinggalan
Indak lamo inyo di jalan
Sampailah inyo maso itu
Iyo di laman rumah gadang
Ustano Tuanku Koto Tuo
Mamakiak Rajo Angek Garang
Basorak dari kudo sajo
Nyariang lantang suaronyo
"Manolah urang ustano ko
Nan banamo laki-laki
Turun malah ka halaman
Kito mambuek paretongan"
Sakali inyo manyaru
Indak ado urang nan turun
Indak ado urang manjanguak
Iyo manjanguak dari tingkok
Disarunyo sakali lai
157
