Dalam sahari duo nangko
Tolong antakan ambo garan
Karimbo tampek ambo batarak
Sinan mananti Pamato Intan
Kok buliah ambo mamintak
Barangkek dubalang kini juo
Bawolah kudo Sambarani
Mambawo makanan untuak inyo
Pamato Intan jo si Bongsu
Makanan ado dalam sumpik
Nan tagantuang di pungguang kudo
Tingga mambawo itu garan
Katokan pado urang banyak
Bahaso ambo alah mati
Dikabumikan di dalam rimbo
Ditanam indak manuruik adaik
Dek ambo iyo urang kalah
Mati indak sabagai rajo
"Ampunlah ambo dang Tuanku
Sagalo titah kami junjuang
Diangkek Tuanku kateh rumah
Dibariangkan di ateh tilam bungo
Nanti kok ado urang datang
Bia inyo picayo pulo
Bahaso Tuanku alah ndak ado
Nak tasia kaba di nagari
Iyo Tuanku alah mati
Tantang kapado mambawo nasi
Iyo kapado Andel Suri
Tantu ambo nan ka pai
Indak ado urang nan tau
Tampektu iyo dirasiokan
Dirasiokan dari daulu
Ambo kumpuakan kini dangai
166
