Lah hampia pagi itu garan
Duo kali ayam bakukuak
Alah basiap kasadonyo
Kok pagi hari baeko
Kok turun rajo ka barundiang
Tigo kali ayam bakukuak
Lah tabik pulo matohari
Alun ado urang mandakek
Baiak pandeka atau dubalang
Sapanggalah mato hari naiak
Tadanga suaro urang banyak
Tampak datuak jo pangulu
Bapakaian adaik inyo garan
Sabanta pulo sudah itu
Lah tampak rajo turun ustano
Tampak urang tu bakato-kato
Saurang di antoronyo
Mungkin garan Rajo Gumanti
Atauko Datuak Mangkubumi
Datang bagageh ka balairong
Bakato inyo maso itu
"Manolah sanak nan banyak ko
Bari jaleh ambo batanyo
Kapatang ado tigo pakaro
Nan diajukan rajo kami
Patamo kok sanak kan mangadu
Itan karajo gadang kito
Nan samayam di Pagaruyuang
Kaduo kok sanak nak baparang
Katigo kok andak manyarah sajo"
Manjawab Tuak Manti maso itu
Iyolah Manti Koto Tuo
"Manolah sanak nan batanyo
Dangakan malah putusan kami
174
