Halaman:Rangkiang Luluih.pdf/186

Katiko bagindo yo kan mati
  Iyo bagindo rajo kami
Ado bapasan inyo garan
  Elok kami manyarah sajo
Rajo siko bukan rang lain
  Anak manantu dek baliau

Kok baliau iduik juo
  Indak lai dapek mamarintah
Anak kakaknyo nan padusi
  Iyo nan kanduang bakeh inyo
Indak ado nan laki-laki
  Nan padusi jauah di rantau

Jadi nan patuik manggantikan
  Indak ado kamanakannyo
Ado garan Sutan Pamenan
  Anak adiak rajo kami
Andehnyo bukanlah Puti
  Bukan turunan Koto Tuo
Indaknyo buliah jadi rajo

Nan buliah manjadi rajo kami
  Iyo Tuanku Mayang Taurai
Dek itu kami disuruah manyarah
  Alah koh sanang hati Datuak
Lah pai Datuak Manti Tuo
  Pai manyambah karajonyo
Sabanta sasudah itu.

Datang Tuanku Angek Garang
  Tasanyum sanyum dari jauah
Bakato inyo ka nan banyak

"Manolah sanak nan banyak ko
  Rakyat nagari Koto Tuo
Lah mah sampai tu kaambo
  Apo nan kandak sanak sadonyo