X. PUTI BADUO DALAM RIMBO
Tasabuik puti nan baduo
Pamato Intan Bongsu Urai
Lah patang ari nan kaduo
Alun ado juo urang datang
Masuaklah inyo ka dalam rimbo
Mancari barang ka dimakan
Ndak tampak buah apo tidak
Batang paraweh si kaduduak
Indak ado di tampek itu
Maalum di dalam rimbo rayo
Lai tampak anak pinang mudo
Umbuiknyo buliah dimakan
Jo apo pulo kan digaruik
Ladiang jo pisau indak ado
Nak baliak inyo maso itu
Ka dangau tampeknyo tadi
Dek jalan lah ilang pulo
Babaliak baliak nyo di rimbo
Lah kalam kironyo hari
Indak dapek bajalan lai
Duduak inyo di bania kayu
Untuang kain lai tabawo
Kok indak tantu tambah susah
Manangih sajo kaduonyo
Tapi takuik kareh-kareh
Kok tadanga dek rimau jo baruang
Tantu badannyo indakkan sadang
Iyo dek binatang rimbo nantun
Si Bongsu muloi maratok
Manyasali ayah bundonyo
Inyo biaso dimanjokan
Kini diazab dalam rimbo
178
