"Antakan juo ambo bisuak
Jalan pulang tantu andeh tau
Andeh pulang ka Koto Tuo
Ambo pai ka Koto Lamo
Lai kan pandai ambo mancari
Iyo jalan ka nagari tu
Ambo lah acok pai ka sanan
Amak inyo lalok lakeh
Bajanji andehnyo maantakan
Usah inyo manangih juo
Badannyo lah latiah mah tampaknyo
Inyo latiah dek bajalan
Latiah pulo dek kalaparan
Batambah latiah dek manangih
Untuang tatidua kaduonyo
Bisuak pagi nyo tajago
Lah agak kuat mah badannyo
Auih lapa indak tatahan
Dicari aia dalam rimbo
Dek lambek lamo bajalan
Tadanga garan bunyi aia
Bunyi aia agak mandaruik
Antah aja tajun antah sarasah
Dikaja malali tampek aia tu
Kironyo iyo anak aia
Tajun dari bukik randah.
Janiah nan bukan alang-alang
Lah minum inyo kaduonyo
Dibukak baju dek si Bongsu
Nakmandi inyo maso itu
Bakato garan dang andehnyo
Mano nak kanduang Bongsu Urai
Usah mandi Upiak di situ
Antah kok tapian mambang
179
