Dicari rantiang kariang-kariang
Didakekkan ka rabuak nan tabaka
Lah dapek api inyo garan
Dicari pulo tuanggua kariang
Dilatakkan diateh tanah kareh
Dibawo api kasinan
Lah gadang tampaknyo api
Dibaka ubi nan duo tadi
Ado sabanta antaronyo
Alah mah masak panggang ubi
Disuruah duduak anak kanduang
Iyo mamakan panggang ubi
Si Bongsu indak nak bagarak
Bagolek juo di tampeknyo
Sarupo paja umua tigo taun
Nan alun tau di salah bana
Indak paduli andeh lah pajah
Indak acuah dijariah andeh
Diambiak ubi dek andehnyo
Dibawo ka dakek anak
Baliaknyo ka tangah ladang
Dicari pulo ubi jala
Lah dapek malah duo buah
Dipanggang baliak kaduonyo
Disimpan untuak makan malam
Alun takana untuak awak
Nan duo untuak anak juo
Lah sudah ubi dipanggang
Lah baliak inyo garan
Indak ado tampak ubi lai
Tapi ado mah nan lain
Iyolah taleh si kumbahang
Taleh tu buliah dimakan
Tapi gak gata lidah dibueknyo
185
