Agak bapikia Pamato Intan
Apo garan nan kan disabuik
Disabuik nan sabananyo
Kok takuik urang manolong
Dalam inyo bapikia nantun
Bakato baliak urang cako
"Lah tigo kali kami lalu
Kami taruih babaliak pulang
Kami manyangko Mambang Gunuang
Rancak muko jo pakaian
Dek tadi kami taruih
Dek kami liek ado api
Mambang indak maiduik kan api
Siapo garan dunsanak ko
Bari jaleh kami batanyo!!
"Kami urang bajua kayu api
Tasasek masuak rimbo rayo
Indak dapek pulang lai
Babaliak-baliak dalam rimbo
Mangkin lamo mangkin jauah
Alah sampai malah di siko
"Dari mano kironyo kakak
Nagari apo ditinggakan
Elok kakak pai jo kami
Lubuak Salasiah nagari kami
Sinan manjua kayu api"
"Manolah sanak nan batanyo
Koto Tuo ambo tinggakan
Iduik iyo mularaik sinan
Urangnyo rajin bakarajo
Kayu api dicari surang
Jarang urang amuah mambali"
189
