Denai ko urang taniayo
Lai denai kan mambaleh jaso
Denai agiah ameh jo intan
Denai angkek jadi pangulu
Laki denai saparentah denai
Indak kan susah mamak lai
Iyo hiduik mancari rotan
Mancaliak nyo mangecek ndak manantu
Maradang maninggi kato
Muaklah urang nan mandanga
Indak ado nan picayo
Bakato inyo pado Pamato
"Manolah kakak rang Koto Tuo
Siapo garan namo kakak
Mupakaik kami barampek
Kok lai amuah kaampeknyo
Kami bawo kakak ka kampuang
Kami pailah daulu
Manjapuik rotan dari utan
Indak jauah kami bajalan
Rotan lah lamo ditinggakan
Manjapuik sajo kami lai
Lah pai urang nan barampek
Bakato si Bongsu dangan berang
Manolah andeh janyo ambo
Sampai ati andeh baitu
Mangatokan ambo urang tele
Sampai urang tu ndak amuah
Baurusan iyo jo ambo lai
Elok ambo dibunuh sajo
Dari diazab macam iko
Badan latiah peruaik lapa
Awak batambah buruak juo
191
