Lah patang kironyo hari
Lah sampai kakampuang urang
Barulah si Bongsu tau
Urang nan tadi di balakang
Di muko sabuah lapau
Bakato urang nan barampek
"Duduak kakak daulu
Di muko lapau urang nangko
Kami pulang daulu
Maagiah tau urang di rumah
Sabanta lai kami datang
Manjapuik kakak kamari
Iyo sabanta antaronyo
Datanglah urang nan barampek
Saurang padusi mairiangkan
"Manolah kakak andeh Lubuak
Karumah ambo kakak daulu
Di sinan kito barundiang"
Bajalan urang kasadonyo
Si Bongsu manuruik sajo
Sabanta hanyo di jalan
Sampai ka rumah Sutan Mudo
Nasi mananti di hidangan
Lah makan urang kasadonyo
Lorong kapado Pamato Intan
Baapo bana lapa paruik
Asa rajo di bawo juo
Duo suok katigo kanyang
Baitu adaik salamonyo
Kok makan di rumah urang
Tantang si Upiak Bongsu Urai
Makan sajo sakanyangnyo
Dek lamo ndak basuo nasi
Paniang inyo maso itu
195
