XI. BONGSU URAI PULANG KA KOTO LAMO
Alah sataun Pamato Intan
Di nagari Lubuak Salasiah
Alah agak elok iduiknyo garan
Ubi jaguangnyo lah bahasia.
Baitu taleh kaladinyo
Pisang mulai babuah pulo
Inyo indak karimbo lai
Pai mancari kayu api
Dibueknyo palanta di muko rumah
Inyo bajaga itu kini
Bajaga kopi jo juadah
Goreng ubi abuih jaguang
Batiah jaguang ado pulo
Taleh jo pisang nan diabuih
Ado pulo dijuanyo
Ado pado satu katiko
Datang urang pakaian dubalang
"Inyo masuak nak minum kopi
'Ambo ado mandanga kaba
Andeh ko urang Koto Tuo
Tukang manjua kayu api
Ambo dubalang Koto Lamo
Ambo disuruah rajo kami
Pai mancari yo adiaknyo
Mancari Puti Bongsu Urai
Urang nagari Koto Tuo
Ado koh andeh mandanga danga
Di mano paja tu kini
Kakaknyo Puti Andeh Suri
Rusuah risau mamikiakannyo
"Mano dubalang nan batanyo
Pabilo garan painyo
Iyolah pai dari kampuang
203
