Kini baiko malah andeh
Kok barek bana hati andeh
Untuak malapeh anak andeh
Bia inyo indak ambo bawo
Tapi iyo itu garan
Ambo indak buliah baliak lai
Iyo ka nagari Koto Lamo
Bini ambo rang Talang Babungo
Bia kami baliak kasinan
Indak baapo itu mandeh
Ibo bana ambo garan
Maliek andeh lah malaraik
Kan tingga pulo surang siko
Kok tibo sakik ngilu paniang
Siapo urang kan manolong"
Mandanga kato nan bak kian
Alah mamakiak Bongsu Urai
Manolah mamak dubalang ko
Kok indak ambo dibawo
Ambo bunuah padusi ko
Ambo cancang jo ladiang gadang
Sudah itu ambo gantuang diri
Alah koh sanang hati mamak
Baitu pulo rang tuo ko
Kato putuih ambo katokan
Indak dapek diubah lai
Tatakua tampak dubalang tu
Bakato sanan Pamato Intan
Sanak dubalang Koto Lamo
Eloklah inyo sanak antakan
Bia ambo tingga di siko
Indak inyo panah manolong
Kok ambo sakik ngilu paniang
Malengong sajo inyo indak
Kok kunun mancari ubek
212
