XII. BONGSU URAI MANDURHAKO
Tasabuik Puti Pamato Intan
Lah tingga surang inyo kini
Langang lingau raso dek inyo
Salamo baduo jo si Bongsu
Bia inyo ndak mangecek
Ado juo mah bakawan
Ado urang kan dimasakkan
Nan kan dijapuik kan aia mandi
Taubek juo hati susah
Katiko siang itu garan
Banyak urang datang mambali
Sanak barampek jo bininyo
Sarato anak-anaknyo
Acok datang mangawani
Untuak bamain galak galak
Lah lupo juo sakik iduik
Kok lah malam hari garan
Taraso barapo paiknyo
Dek iduik tagolek surang
Laki mati anak lah pai
Ayah jo andeh lah mati pulo
Sanak jauah tingga di kampuang
Awak biaso tidua di anjuang
Di ateh tilam tigo lampih
Diantaro banta nan basusun
Dalam kalambu suto cino
Indak digigik rangik ciek
Kini baiko parasaian
Tidua di ateh papan karch
Rangik mandanguang bagai labah
Apo garan salah badan
Kapado bumi sarato langik
215
