Kok tajadi macam daulu
Tantu inyo kan tambah susah
Daulu lai mah baduo
Iyo jo si Upiak Kuniang
Kini inyo dilarikan urang
Bajalan jo siapo lai
Tapi inyo ndak tatagah
Bakato inyo maso itu
"Ambo pai indak kan lamo
Barang sabulan duo bulan
Sakadar mancubo cari sajo
Anak ambo si Upiak Kuniang
Kok indak lakeh nyo basuo
Ambo babaliak mah kamari
Tantang rumah jo alaiknyo
Indak ado ambo pangapokan
Tolong sajo malah unyi
Dek saurang anak kito
Siapo nan amuah sajo
Ubi jala jo ubi kayu
Lah ampia tuo itu kini
Indak cukuik sabulan lai
Alah buliah tu diambiak
Dek jaguang alah bapanggau
Pisang banyak pulo nan tuo
Buliah digatok malam-malam
Dek paja-paja nan maunyi."
”Bukan itu kami rusuahkan
Tapi diri kakak surang
Indak tantu arah tujuan
Kok abih pitih di jalan
Anak indak juo basuo
Mungkin tajadi itu beko
Kakak manjadi rang mintak mintak
217
