Halaman:Rangkiang Luluih.pdf/231

Bialah mati kalaparan
Kamintak mintak ambo indak
Indak ambo kan mambawo
Iyo tampuruang atau talang
Manampuang nampuang pambarian

Tapi anyo akan sabuah
Kok urang bajalan surang
Bajalan ndak tantu arah
Tantu disabuik pamintak mintak
Atau urang batuka aka
Salamat tingga sanak sadonyo
Kok ambo indak babaliak
Rilakan sagalo nan tamakan
Sarato jariah payah sanak
Galagah batang galagah
Elok ditateh madang baliak
Kami tagah indak tatagah
Kami suruah mah baiak-baiak

Bajalan malah Pamato Intan
Mamakai kain campang campiang
Kok dipakai nan gak elok
Pitih saketek nan di pinggang
Kok diambiak urang pulo
Inyo bajalan gontai sajo
Di mano panek nyo baranti
Nasi mah ado di bawonyo
Untuak tahan duo hari
Goreng ayam jo abuih talua
Itu untuak lauak pauaknyo
Abuih ubi jo abuih taleh
Ado pulo panambahnyo

Dibawo saketek-saketek
Di mano malam nyo baranti
Manumpang lalok di kadai urang
Dek inyo mambawo parang