Diambiak malah kayu api
Dijujuang ka lapau nasi
Kadang-kadang sampai ka pakan
Batambah juo balanjo saketek
Dek lambek lamo di jalan
Sampai inyo katapi Koto
Katapi nagari Koto Lamo
Singgah inyo kadalam kadai
Diganti baju compang campiang
Jo baju nan agak elok
Tapi alah lusual juo
Dek labuah basimpang tigo
Ditanyo jalan ka ustano
Inyo mancari dang adiaknyo
Jadi dubalang di ustano
Nan bagala Sutan Diateh
Ditunjuakkan urang labuahnyo
Bajalan inyo lambek-lambek
Lah sampai kalua paga
Lah tampak Sutan Diateh
Sadang duduak dakek rangkiang
Mancaliak urang bakarajo
Manurunkan padi kakatidiang
Disuruahnyo paja ketek
Manjapuik Sutan Diateh
Alah mah tibo inyo garan
Takajuik inyo maso itu
Bakato tapatah patah
Ampunlah ambo Andeh kanduang
Mangapo Andeh kamari
Kok tampak dek rajo kami
Andeh dipancuang jo padangnyo
Inyo di anjuang tumah kini
Untuang kok lai nyo takalok
{{rh|||219]]
