Halaman:Rangkiang Luluih.pdf/233

"Baapo garan caritonyo
Wakatu si Bongsu pulang
Lai koh inyo takana juo
Iyo dek Rajo Angek Garang
Lai koh elok sambutannyo.

Mandanga kato andeh tuo
Galak tabahak Sutan Diateh
Bakato inyo maso itu
Urang dicari nan lah pulang
Indak tabado banyak pitih
Nan lah dihambua-hambuakan
Untuak mancari Bongsu Urai
Di mano hatinyo ndak kan sanang

Baru tibo kami garan
Tibo maso tangah hari
Ambo balari masuak ustano
Tatingga Puti di halaman
Baru abih ambo manyambah
Tagak Tuanku Angek Garang
Dikaja Puti kahalaman
Puti Bongsu mangaja pulo.
Dijulang Tuanku tigo kali
Dipangku dibawo katel anjuang

Pado maso katiko itu
Puti Tuo turun kahalaman
Andak manyuruah rang manjamua
Mandakek inyo kaadiaknyo
Indak malengong Puti Bongsu

Barapo hari nyo ndak turun
Dari ateh anjuang perak
Indak ado urang nan tau
Galaknyo sajo nan tadanga
Galak badarai kaduonyo
Mambuek urang banyak jijik