Halaman:Rangkiang Luluih.pdf/246

Ambo katokan pado si Mayang
Anak ambo lai iduik juo
Nan banamo Sutan Maulano
Ambo baru tau garan
Baso urangko bamainan
Ambo tau dari adiak ambo
Adiak ambo di Koto Anau
Nan banamo Datuak Majo Lelo

Mandanga namo Sutan Maulano
Sananglah hati Mayang Taurai
Inyo galak jo aia mato
"Dimano inyo kini kakak
Antakan ambo ka inyo
Untuak pambasuah basuah piriang
Inyo tantu lah ado bini
Salaruik salamo iko
Indak mungkin inyo bujang juo

Ambo katokan ka si Mayang
Iyo inyo alah babini
Kapado anak adiak kakak
Tapi rang ko sadonyo tau
Hati Maulano ka si Mayang
Maulano sandiri mangatokan

Ambo mintak ka mamak ambo
Iyo Sutan Mangkuto Ameh
Nan tingga di Koto Tuo
Untuak maanta Mayang Taurai
Sarato Upiak Sari Intan

Inyo ditarimo elok urang
Iyolah urang Koto Anau
Dikawinkan jo alek gadang
Kami ko juo pai baralek
Disabuik dek adiak ambo
Kapado urang nan di siko