Batambah pulo itu garan
Iyo urang tuo-tuo kami
Manti Tuo jo Mangku Bumi
Disabuik alah mati juo
Tuanku Sutan Maulano
Lah lamo pulo disabuik mati
Indak koh kito tarimo suko
Kapado bumi jo langik
Nan maubah sagalo latak
Nan di ujuang alah ka pangka
Nan di tapi alah ka tangah
Bapikia kito kini nangko
Nan takana di hati ambo
Tujuah hari kito baralek
Alun kan abih kabau kito
Nan partamo tujuah ikua
Nan kaduo cukuik anam sajo
Nan katigo iyo limo ikua
Nan kaempek iyo ampek pulo
Kalimo iyo tigo sajo
Kaanam duo ikua pulo
Katujuah cukuik lah ciek
Hanyo duo puluhan lapan
Taraso dek ambo surang
Pangulu sajo nan maisi
Ditambah urang kayo-kayo
Kan balabiah itu garan
Kok bareh nan ka dimakan
Indak kito kan mamintak
Diadokan sajo itu garan
Talabiah urang Koto Tuo
Lah lamo indak baralek
Alah labiah sapuluah taun
Sajak kawinnyo Puti Pinang Masak
250
