XV. ALEK GADANG DI RANGKIANG LULUIH
Sahabih rapek nan cako tu
Mulai urang baase
Managakkan balerong samantaro
Mambali aguang ka Sungai Pua
Sarato sabuah ka Galuah Gandang
Mancari kayu api jo talang
Mambali karambia banyak-banyak
Manumbuak padi samo-samo
Tiok urang ado karajonyo
Tampek ustano nan luluih tu
Dibari bapaga kukuliliang
Iyo bapaga kayu ruyuang
Usah tajatuah paja-paja
Nan nak maliek ka dalamnyo
Dibuek pulo gaba-gaba
Di saluruah labuah rang kan masuak
Masuak nagari Rangkiang Luluih
Balerong jo rumah gadang
Dibari batabia langik-langik
Batirai babanta gadang ketek
Urang di rumah masing-masing
Batabia balangik-langik pulo
Bagaba-gaba di lamannyo
Inyo kan manarimo tamu pulo
Iyo manti samo mantinyo
Pengulu samo pangulunyo
Nan bamalam di Rangkiang Luluih
Sapakan kan baralek
Urang baduduak-duduak
Manantukan lorong surang-surang
Dalam alek itu nanti
Tuanku Sati jadi nan tuonyo
254
