Iyo batanak jo manggulai
Untuak urang duo nagari
Sarato urang nan dipajuik
Pagi hari barisuaknyo
Urang bararak ka tapian
Iyo tapian rajo-rajo
Sutan Maulano nan diarak
Inyo bajalan di muko sakali
Di kanannyo rajo dari Pagaruyuang
Nan diwakili Basa Ampek Balai
Duo orang inyo nan datang
Di kidanyo Tuanku Nan Sati
Di balakang rang gadang nan batigo
Nan turuik di asam basa
Di kida kanan rang batigo
Iyolah urang rajo-rajo
Di balakang itu pulo
Manti pangulu nan banyak tu
Di tutuik urang mudo-mudo
Di balakang itu pulo garan
Baru padusi babarih-barih
Mambawo talam dulang carano
Barisi limau badak jo kasai
Sarato siriah salangkok nyo
Kumayan putiah paralu pulo
Tapi katapi padusi tu
Urang bagandang barabano
Sarato barabab bakucapi
Canang talempong pai juo
Hiruak-pikuak labuah ka tapian
Alah sampai urang kasadonyo
Katangah malah dukun tuo
Dibakanyo kumayan putiah
Dikarek limau tujuh raganu
257
