Tagak di tangah Sutan Maulano
Katigo rang gadang kaliliangnyo
Diusoki dukun jo kumayan
Diliamaui urang kaampeknyo
Dari ubun sampai ka kaki
Diseraki jo bareh kuniang
Sarato bungo tujuah ragam
Banalam Mandeh Rubiah
Abih mudonyo Sutan Maulano
Diiliakan aia katapian
Darah mudo kok pamberang
Dianyuikkan aia pulo
Muluik kok kaku salamo ko
Di bawo kailia dek aia ko
Mamintak kami bakeh aia
Agiah cahayo rajo kami
Agiah pamanih rajo kami
Mamintak kami pado langik
Turunkan tuan ka rajo kami
Mano bumi nan sati ko
Bari sati rajo kami
Nak takuik urang jahek
Bari pakasiah rajo kami
Nak sayang urang kasadonyo
Bari piganta rajo kami
Nak tunduak urang bawahannyo
Mano bulan jo mato hari
Tarangi jalan rajo kami
Bari pitunjuak inyo garan
Bari ilimu jo pangaja
Nak nyo manjadi rang jauhari
Urang nan arih bijaksano
Lah habih malah Mandeh Rubiah
Dukun tuo mambaco manto
258
