Sudah itu Tuanku Sati
Sarato Puti Pamato Intan
Urang batigo disiram juo
Aia bungo nan balabiah
Diserakkan di ulu tapian
Baru inyo buliah mandi bana
Di bawah pincuran tujuah
Lah sudah pulo itu garan
Inyo dibari pakaian rajo
Salain mangkuto jo sanjato
Diarak pulo inyo pulang
Lah tibo di ateh rumah
Naiak kaateh palaminan
Di bawah tirai langik-langik
Tagak sajo di tangah-tangah
Disuruah tagak di dakeknyo
Iyo Puti Mayang Taurai
Jo rambuik tagerai panjang
Lah tagak inyo elok-elok
Datang Andeh Nilam Cayo
Mambawo mangkuto ameh
Andeh Pamato Intan
Mambawo tangkuluak tanduak
Disarahkan mangkuto ameh
Kapado Basa Ampek Balai
Mawakili Rajo Pagaruyuang
Bakato rajo maso itu
"Denai latakkan mangkuto ko
Di ateh kapalo Sutan Maulano
Denai angkek inyo ka ateh
Bagala Datuak Mangkuto Ameh
Manjadi Rajo Rankiang Luluih
Mangkuto ko barang batuah
260
