Rajo malatakkan itu garan
Tangkuluak tanduak banang ameh
Tandonyo inyo lah manjadi
Andeh Suri di Rangkiang Luluih
Tapanca tangih Mayang Taurai
Lah duo kali itu garan
Inyo diangkek dek rajo ko
Manjadi Andeh Suri di nagari
Tapi iyo nan kini ko
Taraso garan dijiwanyo
Baban barek nan kan dipikua
Bukan bamain basanda gurau
lyo jo rajo di ustano
Tantang urang nan maliek
Banyak pulo nan tatangih
Dek banyak bana nan taraso
Nan patuik barubah nan ka datang
Talabiah Andeh Nilam Cayo
Sarato Andeh Pamato Intan
Tantang urang nan batigo
Diagiah pulo nyo basaluak
Saluak Rajo Gumanti
Saluak Datuak Mangku Bumi
Nan baduo dilatakkan Basa Ampek Balai
Nan surang dek Datuak Mangkuto Ameh
Bajanji pulo inyo garan
Kan manjunjuang saluak nantun
Sabagai lambang karajonyo
Nan kan dijujuang sudah itu
Diagiah inyo bakarih
Untuak panjago diri
Diagiah pulonyo batungkek
Untuak panunjuak jalan
Basumpah pulo inyo garan
Kan manjago kurenahnyo
262
