Kan manjago kurenahnyo
Sarato laku parangsinyo
Lah sudah itu kasadonyo
Barulah urang buliah duduak
Rajo janang mangatangahkan
Iyo hidangan makan siang
Makanlah urang kasadonyo
Lah sudah minum jo makan
Urang bararak kini nangko
Bararak bajalan kaki
Indak buliah pakai kudo
Indak buliah pakai tandu
Langik jo bumi nak maliek
Barapo kuaiknyo rajo baru tu
Nan mulo-mulo didatangi
Iyolah kampuang nan tadakek
Kampuangnyo Datuak Mangku Bumi
Rakyat sinan alah mananti
Di laman rumah nan gadang
Manjujuang juadah dalam bakuak
Sarato aia dalam ciubak
Rajo-rajo naiak ka rumah
Disonsong do siriah di carano
Di ateh rumah disugu juadah
Iyo galamai paniaram
Kareh-kareh jo dakak-dakak
Sarang balam jo bungo inai
Mayang pinang jo ondeh-ondeh
Urang nan tingga di halaman
Disugu pulo dek rakyat
Jo juadah di bakua tadi
Dibari minum sayak baukia
Dari cibuak nan baukia pulo
263
