Kalua dari lubuak hati
Tarimo suko ambo garan
Jo sagalo nan dibuek
Untuk ambo jo si Mayang
Kito mulaimah jo elok
Sajak mangkuto ambo jujuang
Jo tolong nan banyak kasadonyo
Elok handaknyo sataruihnyo
Sampai mangkuto ambo latakkan
Indak takao manjujuangnyo
Mamintak ambo ka nan tuo-tuo
Mamintak sakali lai
Tolonglah uleh mano nan singkek
Iyo di karek nan tajulai
Disambuang mano nan patuik
Salamo ambo mamarentah
Kapado sanak saudaro
Rajo-rajo nan bakuliliang
Ambo mintak baitu juo
Sasudah ambo baliak nanti
Dari nagari Paga Ruyuang
Dari manyambah Rajo kito
Sarato Basa ampek Balai
Ambo bajanji pado sanak
Kan datang pulo tu batandang
Iyo agak samalani sajo
Ambo jo Puti Mayang Taurai
usah ambo dinanti-nanti
Ambo datang bagai dunsanak
Bukan sabagai urang gadang
Mamakai adaik kabasaran
Mukasuik sangajo dalam hati
Handak pai ka Sungai Pagu
267
