Untuak inyo ado mato kau
Iko mah bagian kau”
Si Pinang ditarajang maso itu
Iyo ka tanggo rumah gadang
Baguliang-buliangnyo ka tanah
Mamakiak sakuaik kuaiknyo
Mintak tolong pado nan maliek
Bagarak Sutan Maulano
Handak manolong rang nan jatuah
Inyo pulo kanai tarajang
Jatuah maimpik Pinang Masak
Dek inyo urang laki-laki
Jatuah indak sampai ka batu
Indak bara inyo kasakitan
Bagarak inyo lalu tagak
Nyo uluakan dang tangannyo
Handak manolong Pinang Masak
Untuang tampak dek andehnyo
Bakato andeh maso itu
“Usah ang awai amai ang tu
Indak itu karajo ang
Banyak nan lain kan manolong
Bakirok waang dari siko”
Lah pai garan Sutan Maulano
Indaknyo pulang ka rumahnyo
Pai sajo nyo jauah-jauah
Takuik dicari dang mamaknyo
Tasabuik Sutan Maulano tu
Urang rancak kurenah elok
Tampan anggun dipandang mato
Amuah bagua jo rang banyak
Suko manolong urang kurang
amuah pulo inyo garan
37
