Iyo di pandam nan dituju
Di tanah lapang katinggian
Di bawah baringin sakti
Bapaga jo aua kuniang
Disalo pudiang nan baririk
Pudiang ameh pudiang jurai
Pudiang maco pudiang jari tangan
Diturunkan tandu dari bahu
Iyo dek urang nan maanta
Dilatakkan di tapi lubang
Lubang nan alah tasadio
Lah kamuko Mandeh Rubiah
Disiram lubang jo aia arun
Aia nan pakai minyak mawa
Disiram jo limau tujuah ragam
Diseraki mayik jo bareh kuniang
Bapantun pulo Mandeh Rubiah
Manolah bumi nan batuah
Tarimo malah andeh kami
Usah datangkan api bumi
Untuak mambaka rang rancakko
Manolah langik nan sakti
Turunkan malah ujan angkau
Pandinginkan tubuah andeh kami
Nak sanang inyo dalam pandam
Mano batang baringin sakti
Kipeh malah pandam iko
Iyo jo daun nan rimbun tu
Nak sanang lalok andeh kami
Alun abih Andeh Rubiah
Maratok baolak olai
Tadanga ratok baibo-ibo
Urang maratok taisak-isak
52
