Bukan itu ratok pitolong
Nan kito danga sajak cako
Tapi ratok andeh kanduangnyo
Andeh kanduang si Pinang Masak
Iyolah Puti Pamato Intan
”Manolah Upiak sayang andeh
O nak kanduang sibiran tulang
Iyolah Upiak Pinang Masak
Samudo iko umua kau
Alun lai cukuik duo puluah
Lah pai jauah dari andeh
Kok rancak lai macam urang
Paunyi rimbo mah kironyo
Saelok itu muko upiak
Makanan caciang mah ruponyo
Padiah paruik den mamikiakan
Raso kan jatuah tangkai jantuang
O nak sayang jolong diambin
Timbunan sayang urang banyak
Apo nak kanduang salah upiak
Mangko berang langik jo bumi
Salakeh itu upiak pai
Sumpah siapo tu nan dapek
Anak denai urang baiak baiak
Baiak hati baiak kurenah”
Mandanga ratok Pamto Intan
Bakato rajo maso itu
Iyolah Rajo Koto Tuo
Iyo Rajo Tuanku Sati
Mano diak kanduang Pamato Intan
Usah kau manangih juo
Janganlah ratok dipapanjang
Hari basarang sanjo juo
Kok kalam ari baeko
53
