Halaman:Rangkiang Luluih.pdf/59

Iyo Tuanku Koto Lamo
Sarato Tuanku Koto Tuo
Ajak makan alek Tuanku
Nasi jo gulai lah tahidang”

Bakato Rajo Angek Garang
Kapado alek nan banyak tu
Ampun ambo ayah Koto Tuo
Sarato ayah jo sanak rajo-rajo

Baitu datuak jo manti manti
Tambah pandeka jo dubalang
Langik alah manurunkan aia
Bumi alah manumbuhkan padi
Sarato daun jo rumpuiknyo
Nan kan manjadi tubuah kito
Ado talatak di hidangan
Nan kan manjadi makanan kito

Birawari kito kasadonyo
Iyo manjangkau nasi jo gulai
Kito mambasuah tangan kito
Sarato manyuok kito lai’’

Bakato sanan saurang rajo
Iyo nan datang dari lua
“Ampun ambo Tuanku Rajo
Iyolah Tuanku Sutan Mangkuto
Sanang hati maliek nasi
Sujuak salero maliek aia
Manarimo suko kami garan

Tapi hanyo akan subuah
Hambo ko sambuangan lidah
Ujuang lidah dek urang banyak
Dek kami ingin batanyo
Mangapo kami dijapuik
Alek apo iko garan’’