Lah sudah sagalo laki-laki
Maidu mancium paja
Maagiahnyo tando suko
Dibawo pulo ka padusi
Sagalo Puti nan duduak tu
Ado maagiah kain lampin
Ado pulo kain paambin
Satangah cincin ameh urai
Ado nan kambiang ka digubalo
Disabuik sajo maso itu.
Alah sudah agiah maagiah
Anak diayun di buajan
Di tangah rumah nan gadang tu
Katangah Puti Pamato Intan
Dipaciknyo tali nan suok
Tali tu cindai nan bapilin
Dek tali sabalah kida
Dipacik dek Andeh Nilam Cayo
Datang si Puti jo kawan-kawan
Iyolah Puti Mayang Taurai
Inyo maayun buaian tu
Didorong saketek dari pangka
Malagu inyo maso itu
"Lalok Buyuang lalok nak sayang
Usah Buyuang manangih juo
Usah diliek urang banyak
Iyo buruak laku anak andeh
Dindang dindinlah anak andeh
Dindin-dindin si Buyuang rancak
Tidua Buyuang lalok nak sayang
Andeh dindong andeh dindinkan
Simantuang di tangah padang
61
