Page:Rangkiang Luluih.pdf/66

  
Iyo duo kali baliak
Ujuang tajelo sampai ka kaki

Balokah jo kain balapak
Tujuah untai maniak di lihianyo
Di lihia mansora aluih
Sudah itu iyo mayang padi
Katigo mayang pinang pulo
Ka ampek si bungo tanjuang
Kalimo daun tigo alai
Kaanam rago batu majan
Katujuah iyo ula gerang
Sadonyo dari ameh mutu

Galangnyo iyo tujuah pulo
Di bawah galang ula taduang
Sudah itu tujuah sarangkai
Dipilin jo ganto ketek
Katigo baru galang rago
Kaampek rago campua maniak
Maniak sirah itu garan
Kalimo karanggo maniak hitam
Kaanam galang gadang tipih
Katujuah baru galang gadang
Dipakai duo balah tangan

Antiangnyo indak lanjuik bana
Tapi balingka gadang-gadang
Lingkanyo dari ameh picak
Diagiah pamato intan tulen
Kilek bakilau dari jauah

Awak rancak pakaian elok
Tumbukan mato urang banyak
Mambuek Rajo Angek Garang
Duduak galisah di tampeknyo
Bak baruak ketek batali pendek

Templat:Right